“သံဆူးကြိုးပေါ်က အ၀ါရောင်နေ့ရက်များ”

26,04,2008
“သံဆူးကြိုးပေါ်က အ၀ါရောင်နေ့ရက်များ”
နားခိုဖို့ ခက်သလို
နင်းချေပစ်ဖို့လဲ ခက်တယ်မေမေ။


ဘ၀က
ဓာတ်ကြိုးပေါ်နားခိုတဲ့ ငှက်တွေလို
သီချင်းမဆိုနိုင်ဘူး။
ပြောပြောဆိုဆို အော်အော်ဟစ်ဟစ်
မလုပ်နိုင်ကြဘူးပေါ့။

သွေးစက်တွေ လိမ်းခြယ်ထားတဲ့
သံဆူးကြိုးပေါ်မှာ
အ၀ါရောင်က
“ငါ့ကို ပွင့်ခွင့်ပေးပါ”လို့
အော်လို့ ဟစ်လို့

ရုန်းတော့လဲ
သွေးတွေပဲ လှိမ့်လှိမ့်ဆင်းတယ်
မရုန်းတော့လဲ
လှိုက်စားခံရတယ်။

အ၀ါရောင်ရေ….
လွတ်လပ်ခြင်းရေ….လို့
ပေါ့ပေါ့ပါးပါးအော်သံထဲမှာတောင်
သွေးစက်တွေက တဒီးဒီး။

မိုးဇော်ကို